Раздзел 1

¹Пра тое, што было́ ад пача́тку, што мы чу́лі, што ба́чылі на свае вочы, што сузіра́лі і што рукі нашы крана́лі, пра Слова жыцця́, –

²бо жыццё яві́лася, і мы ба́чылі, і све́дчым, і абвяшча́ем вам гэтае жыццё вечнае, якое было́ ў Айца і яві́лася нам, –

³пра тое, што мы ба́чылі і чу́лі, абвяшча́ем вам, каб і вы ме́лі супо́льнасць з намі; а наша супо́льнасць – з Айцом і Сы́нам Яго Іісусам Хрыстом.

⁴І гэта пі́шам вам, каб ра́дасць ваша была́ поўная.

⁵І вось тая ве́стка, якую мы чу́лі ад Яго і абвяшча́ем вам: Бог ёсць святло́, і няма ў Ім нія́кай це́мры.

⁶Калі мы ка́жам, што ма́ем супо́льнасць з Ім, а ходзім у це́мры, то мы хлу́сім і не робім паво́дле і́сціны;

⁷калі ж хо́дзім у святле́, як Ён у святле́, то ма́ем супо́льнасць адзін з адны́м, і Кроў Іісуса Хрыста, Сы́на Яго, ачышча́е нас ад усякага граху́.

⁸Калі мы ка́жам, што не ма́ем граху́, то ашу́кваем саміх сябе, і і́сціны няма ў нас.

⁹Калі вы́знаем грахі́ нашы, то Ён, ве́рны і пра́ведны, праба́чыць нам грахі́ нашы і ачы́сціць нас ад усякай няпра́ўды.

¹⁰Калі кажам, што мы не саграшы́лі, то ро́бім з Яго лгуна́, і сло́ва Яго няма́ ў нас.

 

Раздзел 2

¹Дзе́ткі мае́! гэта пішу я вам, каб вы не грашы́лі; а калі хто саграшы́ць, то мы ма́ем Хада́йніка перад Айцом, Іісуса Хрыста́, Пра́ведніка:

²Ён – уміласціўле́нне за грахі́ нашы, і не толькі за нашы, але і за грахі́ ўсяго свету.

³А тое, што мы спазна́лі Яго, ве́даем па тым, што за́паведзі Яго выко́нваем.

⁴Хто кажа: «я спазна́ў Яго», а за́паведзяў Яго не выко́нвае, той ілгун, і няма ў ім і́сціны;

⁵а хто выко́нвае слова Яго, у тым сапраўды́ любоў Божая даскана́лая: з гэтага ве́даем, што мы ў Ім.

⁶Хто кажа, што знахо́дзіцца ў Ім, той павінен паво́дзіць сябе так, як Ён паво́дзіў Сябе.

⁷Узлю́бленыя! пішу вам не новую за́паведзь, а за́паведзь да́ўнюю, якую вы ме́лі ад пача́тку: за́паведзь да́ўняя – гэта слова, якое вы чу́лі ад пача́тку.

⁸А разам з тым і новую за́паведзь пішу́ вам: што́ ёсць і́сціннае і ў Ім, і ў вас, бо це́мра прахо́дзіць і святло і́сціннае ўжо све́ціць.

⁹Хто кажа, што ён у святле́, а брата свайго ненаві́дзіць, той усё яшчэ ў це́мры.

¹⁰Хто лю́біць бра́та свайго, той у святле́ знахо́дзіцца, і няма ў ім спаку́сы;

¹¹а хто ненаві́дзіць бра́та свайго, той – у це́мры, і ў це́мры ён хо́дзіць, і не ве́дае, куды́ ідзе́, бо це́мра засляпі́ла во́чы яму́.

¹²Пішу вам, дзе́ткі, таму што праба́чаны вам грахі́ дзе́ля імя́ Яго.

¹³Пішу вам, айцы, таму што вы спазна́лі Таго, Хто ёсць ад пача́тку. Пішу вам, юнакі́, таму што вы перамаглі́ злога. Пішу вам, дзе́ці, таму што вы спазна́лі Айца.

¹⁴Я напіса́ў вам, айцы, таму што вы спазна́лі Таго, Хто ёсць ад паче́тку. Я напіса́ў вам, юнакі́, таму што вы мо́цныя, і слова Божае знахо́дзіцца ў вас, і вы перамаглі́ зло́га.

¹⁵Не любі́це све́ту і таго, што ў све́це: хто лю́біць свет, у тым няма любо́ві Айца;

¹⁶бо ўсё, што ў свеце: пажа́длівасць плоці, пажа́длівасць вачэй і ганарлі́васць жыце́йская, – не ад Айца, а ад све́ту гэтага.

¹⁷І свет прахо́дзіць, і пажа́длівасць яго, а той, хто выко́нвае волю Божую, застае́цца наве́кі.

¹⁸Дзеці! гэта апо́шні час. І пако́лькі вы чу́лі, што пры́йдзе анты́хрыст, а цяпер з’яві́лася многа анты́хрыстаў, то па гэтым мы і пазнаём, што час апошні.

¹⁹Яны вы́йшлі з нас, але не былі́ нашымі; бо калі б яны былі́ нашымі, то засталі́ся б з намі; а гэта адбыло́ся, каб вы́явілася, што не ўсе нашы.

²⁰А вы ма́еце пама́занне ад Святога і ве́даеце ўсё.

²¹Я напіса́ў вам не таму, што вы не ве́даеце і́сціны, а таму, што вы ве́даеце яе, і таму, што ўсякая ілжа́ не ад і́сціны.

²²Хто лгун, як не той, хто адмаўля́е, што Іісус ёсць Хрыстос? Гэта – анты́хрыст, які адмаўля́е Айца́ і Сы́на.

²³Кожны, хто адмаўля́е Сы́на, не ма́е і Айца; а хто вызнае́ Сы́на, той ма́е і Айца.

²⁴Дык вось, тое, што вы чу́лі ад пача́тку, няхай і застае́цца ў вас; калі застане́цца ў вас тое, што вы чу́лі ад пача́тку, то і вы застаняце́ся ў Сыне і ў Айцу́.

²⁵А тое абяца́нне, што Ён абяца́ў нам, ёсць жыццё ве́чнае.

²⁶Гэта я напіса́ў вам пра тых, якія ўво́дзяць вас у зман.

²⁷Аднак пама́занне, якое вы атрыма́лі ад Яго, застае́цца ў вас, і вы не ма́еце патрэ́бы, каб хто вучы́ў вас; але паколькі само гэтае пама́занне ву́чыць вас усяму, а яно і́сціннае і нялжы́вае, дык чаму́ яно навучы́ла вас, у тым і застава́йцеся.

²⁸І цяпер, дзеткі, застава́йцеся ў Ім, каб, калі Ён я́віцца, мы ме́лі адва́гу і не былі́ пасаро́млены перад Ім у час прышэ́сця Яго.

²⁹Калі вы ве́даеце, што Ён пра́ведны, то ве́дайце таксама, што кожны, хто робіць па праўдзе, ад Яго наро́джаны.

 

Раздзел 3

¹Глядзі́це, якую любоў даў нам Айцец: каб мы называ́ліся дзе́цьмі Божымі; і мы з’яўля́емся імі. Свет таму не ве́дае нас, што не спазна́ў Яго.

²Узлю́бленыя! мы цяпер дзе́ці Божыя; але яшчэ́ не адкры́лася, чым мы будзем; ве́даем толькі, што калі адкры́ецца, то падо́бнымі да Яго будзем, таму што ўба́чым Яго, як Ён ёсць.

³І кожны, хто ма́е надзею гэтую на Яго, ачышча́е сябе, пако́лькі і Ён чы́сты.

⁴Кожны, хто робіць грэх, робіць і беззако́нне; бо грэх – гэта беззако́нне.

⁵І вы ве́даеце, што Ён яві́ўся, каб узя́ць грахі́ нашы, а ў Ім граху́ няма.

⁶Кожны, хто ў Ім застае́цца, не грашы́ць; кожны, хто грашы́ць, той не бачыў Яго і не спазна́ў Яго.

⁷Дзеткі! няха́й ніхто не ўво́дзіць вас у зман. Хто ро́біць па пра́ўдзе, той пра́ведны, падо́бна як Ён пра́ведны.

⁸Хто робіць грэх, той ад дыя́вала, таму што дыя́вал ад пача́тку грашы́ць. Для таго і явіўся Сын Божы, каб зні́шчыць спра́вы дыя́вала.

⁹Кожны наро́джаны ад Бога не ро́біць граху́, таму што се́мя Яго застае́цца ў ім; і ён не можа грашы́ць, бо наро́джаны ад Бога.

¹⁰Вось па чым пазнаю́цца дзеці Божыя і дзеці дыя́вала: кожны, хто не ро́біць па пра́ўдзе, той не ад Бога, такса́ма і той, хто не лю́біць брата свайго.

¹¹Бо вось запаве́т, які вы чулі ад пачатку: каб мы любі́лі адзін аднаго́;

¹²не так, як Каін: ён быў ад злога і забі́ў бра́та свайго. А чаму забі́ў яго́ Таму, што спра́вы яго былі злымі, а спра́вы брата яго пра́веднымі.

¹³Не здзіўля́йцеся, браты́ мае́, калі ненаві́дзіць вас свет.

¹⁴Мы ведаем, што мы перайшлі́ ад сме́рці ў жыццё, таму што лю́бім братоў; хто не лю́біць брата, той застае́цца ў сме́рці.

¹⁵Кожны, хто ненаві́дзіць бра́та свайго, той чалавеказабо́йца; і вы ве́даеце, што ніякі чалавеказабо́йца не ма́е жыцця ве́чнага, якое б у ім застава́лася.

¹⁶Любоў спазна́лі мы ў тым, што Ён за нас душу́^*Сваю пакла́ў; і мы паві́нны за брато́ў ду́шы свае кла́сці.

¹⁷А хто будзе мець дабрабы́т у све́це і будзе ба́чыць, што брат яго ў няста́чы, але закры́е сэрца сваё ад яго, то як жа застане́цца ў ім любоў Божая́

¹⁸Дзеткі мае́! дава́йце будзем любі́ць не сло́вам і не языко́м, а спра́ваю і і́сцінаю.

¹⁹І па гэтым пазнаём, што мы ад і́сціны, і супако́ім перад Ім сэ́рцы нашы:

²⁰бо калі сэ́рца будзе асуджа́ць нас, Бог бо́льшы за сэ́рца наша і ведае ўсё.

²¹Узлю́бленыя! калі сэ́рца наша не асуджа́е нас, то мы ма́ем адва́гу перад Богам,

²²і чаго б ні прасі́лі, атрыма́ем ад Яго, бо за́паведзі Яго выко́нваем і ўго́днае Яму ро́бім.

²³А за́паведзь Яго такая: каб мы ве́равалі ў імя́ Сына Яго Іісуса Хрыста́ і любі́лі адзін аднаго́, як Ён запаве́даў нам.

²⁴І хто выко́нвае за́паведзі Яго, той застае́цца ў Ім, і Ён у тым. А што Ён застае́цца ў нас, пазнаём па Ду́ху, Якога Ён даў нам.

 

 

Раздзел 4

¹Узлю́бленыя! не кожнаму ду́ху ве́рце, а выпрабо́ўвайце ду́хаў, ці ад Бога яны, таму што многа лжэпраро́каў з’яві́лася ў све́це.

²Духа Божага пазнава́йце так: кожны дух, што вызнае́ Іісуса Хрыста, Які прыйшоў у плоці, ёсць ад Бога;

³а кожны дух, што не вызнае́ Іісуса Хрыста, Які прыйшоў у плоці, не ёсць ад Бога, а гэта дух анты́хрыста, пра якога вы чу́лі, што ён пры́йдзе, і ён цяпер ужо ў све́це.

⁴Дзеткі! вы ад Бога, і вы перамаглі́ іх; бо Той, Хто ў вас, бо́льшы за таго́, хто ў свеце.

⁵Яны ад свету, таму і гаво́раць так, як гаворыць свет, і свет слу́хае іх.

⁶Мы ад Бога; хто зна́е Бога, той слу́хае нас; хто не ад Бога, той не слу́хае нас. Па гэтым пазнаём ду́ха і́сціны і ду́ха маны́.

⁷Узлю́бленыя! дава́йце бу́дзем любі́ць адзін аднаго́, таму што любоў ад Бога, і кожны, хто лю́біць, той наро́джаны ад Бога і зна́е Бога;

⁸хто не лю́біць, той не спазна́ў Бога, таму што Бог ёсць любоў.

⁹Любоў Божая да нас адкры́лася ў тым, што Бог пасла́ў у свет Сы́на Свайго Адзінаро́днага, каб мы атрыма́лі жыццё праз Яго.

¹⁰У тым любоў, што не мы ўзлюбі́лі Бога, а Ён узлюбі́ў нас і пасла́ў Сы́на Свайго як уміласціўле́нне за грахі́ нашы.

¹¹Узлю́бленыя! калі так узлюбі́ў нас Бог, то і мы паві́нны любі́ць адзін аднаго́.

¹²Бога ніхто ніколі не ба́чыў; калі мы лю́бім адзін аднаго́, то Бог знахо́дзіцца ў нас, і любоў Яго ў нас даскана́лая.

¹³Мы пазнаём, што знахо́дзімся ў Ім і Ён у нас, па тым, што ад Духа Свайго Ён даў нам.

¹⁴І мы ба́чылі і све́дчым, што Айцец пасла́ў Сы́на Спасі́целем све́ту.

¹⁵Хто вызнае́, што Іісус – Сын Божы, у тым знахо́дзіцца Бог, і ён у Богу.

¹⁶І мы спазна́лі і вераю прынялі́ любоў, якую Бог ма́е да нас. Бог – гэта любоў, і хто знахо́дзіцца ў любо́ві, той знахо́зіцца ў Богу, і Бог у ім.

¹⁷Любоў такой даскана́ласці дасяга́е ў нас, што мы будзем мець адва́гу ў дзень суда́, бо які Ён, такія і мы ў све́це гэтым.

¹⁸У любо́ві няма стра́ху, а даскана́лая любоў праганя́е страх, бо ў стра́ху ёсць пакара́нне; і хто баіцца, той недаскана́лы ў любо́ві.

¹⁹Мы лю́бім Яго, бо Ён першы ўзлюбі́ў нас.

²⁰Калі хто кажа: «я люблю Бога», а бра́та свайго ненаві́дзіць, то ён ілгу́н; бо хто не лю́біць бра́та свайго, якога ба́чыць, як можа любі́ць Бога, Якога не ба́чыць?

²¹І мы ма́ем ад Яго такую за́паведзь, каб той, хто лю́біць Бога, любі́ў і бра́та свайго.

 

Раздзел 5

¹Кожны, хто ве́руе, што Іісус гэта Хрыстос, той ад Бога наро́джаны, і кожны, хто лю́біць Таго, Хто нарадзі́ў, лю́біць і наро́джанага ад Яго.

²Што лю́бім дзяцей Божых, мы пазнаём па тым, што лю́бім Бога і выко́нваем за́паведзі Яго.

³Бо ў тым любоў да Бога, каб мы выко́нвалі за́паведзі Яго; а за́паведзі Яго не ця́жкія.

⁴Таму што ўсё, наро́джанае ад Бога, перамага́е свет; і вось перамо́га, якая перамагла́ свет: вера наша.

⁵Хто перамага́е свет, як не той, хто ве́руе, што Іісус ёсць Сын Божы?

⁶Гэта Той Іісус Хрыстос, Які прыйшо́ў вадою, і крывёю, і Ду́хам, не вадою толькі, а вадою і крывёю; і Дух сведчыць пра Яго, таму што Дух ёсць і́сціна.

⁷Бо трое све́дчаць на небе: Айцец, Сло́ва і Святы́ Дух; і Гэтыя трое ёсць адно.

⁸І трое све́дчаць на зямлі: дух, вада і кроў; і гэтыя трое – пра адно.

⁹Калі мы прыма́ем све́дчанне людзей, то све́дчанне Бога – бо́льшае, таму што гэта сва́дчанне Бога, якім Ён засве́дчыў пра Сы́на Свайго.

¹⁰Хто ве́руе ў Сына Божага, той ма́е све́дчанне ў сабе самі́м; хто не ве́руе ў Бога, той робіць Яго лгуно́м, бо не ве́рыць све́дчанню, якім Бог засве́дчыў пра Сы́на Свайго.

¹¹І вось гэтае све́дчанне: Бог даў нам жыццё ве́чнае, і гэтае жыццё – у Сы́не Яго.

¹²Хто ма́е Сына Божага, той ма́е жыццё; хто не ма́е Сына Божага, той не ма́е жыцця́.

¹³Гэта напіса́ў я вам, хто веруе ў імя́ Сына Божага, каб вы ведалі, што вы ма́еце жыццё вечнае, і каб ве́равалі ў імя́ Сына Божага.

¹⁴І вось якую адва́гу мы маем да Яго: калі про́сім чаго́сьці па волі Яго, то Ён слу́хае нас.

¹⁵А калі мы ве́даем, што Ён слу́хае нас, чаго б мы ні прасі́лі, то ве́даем, што атры́мліваем тое, чаго прасі́лі ў Яго.

¹⁶Калі хто ба́чыць брата свайго, які саграша́е грахом не на сме́рць, то няхай мо́ліцца, і Бог дасць жыццё яму – таму, які саграша́е не на смерць. Ёсць грэх на смерць, не пра такі кажу́, каб ён малі́ўся.

¹⁷Усякая няпра́веднасць – гэта грэх; але ёсць грэх не на смерць.

¹⁸Мы ведаем, што кожны, наро́джаны ад Бога, не грашы́ць; але наро́джаны ад Бога захо́ўвае сябе, і ліхі́ не дакрана́ецца да яго.

¹⁹Мы ве́даем, што мы ад Бога і што ўвесь свет ляжы́ць у зле.

²⁰Ведаем таксама, што Сын Божы прыйшоў і даў нам святло і розум, каб мы спазна́лі Бога і́сціннага, і мы ёсць у і́сцінным Сыне Яго Іісусе Хрысце́. Ён – і́сцінны Бог і жыццё ве́чнае.

²¹Дзеткі! захо́ўвайце сябе ад і́далаў. Амі́нь.