Раздзел 1

¹Павел, воляю Божаю Апостал Іісуса Хрыста, паводле абяца́ння жыцця ў Хрысце Іісусе,

²Цімафею, узлю́бленаму сыну: благадаць, міласць, мір ад Бога Айца і Хрыста Іісуса, Госпада нашага.

³Дзякую Богу, Якому служу ад продкаў у чыстым сумленні, што не перастаю́ паміна́ць цябе ў малітвах маіх уночы і ўдзень;

⁴па́мятаючы слёзы твае, я пра́гну ўбачыць цябе, каб мне напоўніцца радасцю;

⁵прыга́дваю сабе тваю некрываду́шную веру, якую раней ме́ла бабуля твая Лаі́да і маці твая Яўні́кія; упэўнены, што і ты маеш яе.

⁶З гэтай прычыны напаміна́ю, каб ты падтры́мліваў у сабе агонь да́ру Божага, які ў табе праз усклада́нне рук маіх;

⁷бо даў нам Бог не дух баязлі́васці, а дух сілы, і любові, і разва́жнасці.

⁸Таму не саромейся ні све́дчання пра Госпада нашага Іісуса Хрыста, ні мяне, вязня Яго; а пакутуй разам са мною за дабравесце Хрыстова сілаю Бога,

⁹Які спас нас і паклікаў паклі́каннем святым не паводле спраў нашых, а паводле Свайго прадустанаўле́ння і благадаці, да́дзенай нам у Хрысце Іісусе раней часоў адвечных,

¹⁰а цяпер адкрытай яўле́ннем Спасіцеля нашага Іісуса Хрыста, Які знішчыў смерць і асвятлі́ў жыццё і нятле́ннасць дабравесцем,

¹¹для якога я пастаўлены прапаведнікам, і Апосталам, і настаўнікам язычнікаў.

¹²З гэтай прычыны я і пакутую так; але не саромеюся. Бо ведаю, у Каго я ўвераваў, і ўпэ́ўнены, што Ён ма́е сілу залог мой захаваць на той дзень.

¹³Узору здаровага вучэ́ння, якое ты чуў ад мяне, трымайся з вераю і любоўю ў Хрысце Іісусе.

¹⁴Захоўвай добры залог сілаю Духа Святога, Які жыве ў нас.

¹⁵Ты ведаеш, што ўсе Асійцы адвярнуліся ад мяне; сярод іх Фі́гел і Ермаген.

¹⁶Няхай дасць Гасподзь міласць дому Анісі́фара за тое, што ён шмат разоў падтры́мліваў мяне і не пасаромеўся аковаў маіх,

¹⁷а калі быў у Рыме, з вялікім стараннем шукаў мяне і знайшоў.

¹⁸Няхай дасць яму Гасподзь знайсці міласць у Госпада ў той дзень; а колькі ён паслужыў мне ў Эфэсе, ты лепш ведаеш.

 

Раздзел 2

¹Ты ж, сыне мой, умацоўвайся ў благадаці, якая ў Хрысце Іісусе,

²і што́ чуў ад мяне пры многіх сведках, тое перадай верным людзям, якія здольныя будуць і іншых навучы́ць.

³Ты ж перанось цяжкасці, як добры воін Іісуса Хрыста.

⁴Ніякі воін не звязвае сябе жыццёвымі справамі, каб дагадзі́ць военачальніку.

⁵Калі ж хто і змагаецца, то не будзе увянча́ны, калі ён незаконна будзе змагацца.

⁶Земляроб, які працуе, першым павінен атрыма́ць сваю частку пладоў.

⁷Абдумай тое, што я кажу. Няхай дасць табе Гасподзь разуме́нне ва ўсім.

⁸Па́мятай уваскрэслага з мёртвых Госпада Іісуса Хрыста, ад семені Давідавага, паводле дабравесця майго,

⁹за якое я пакутую аж да кайданоў, як злачынец; але на слова Божае няма кайданоў.

¹⁰Таму я ўсё цярплю дзеля абраных, каб і яны атрымалі спасенне ў Хрысце Іісусе са славаю вечнаю.

¹¹Вартае веры слова: калі мы з Ім памерлі, то з Ім і ажывём;

¹²калі церпім, то з Ім і царстваваць будзем; калі адрачомся, то і Ён адрачэцца ад нас;

¹³калі мы няверныя, то Ён застаецца верным, бо ад Сябе адрачы́ся не можа.

¹⁴Гэта нагадвай, перад Госпадам заклінаючы не ўступаць у сваркі, ад якіх няма ніякай карысці, а толькі згу́ба слухача́м.

¹⁵Старайся праяві́ць сябе перад Богам годна, як працаўнік бездакорны, які правільна выклада́е сло́ва ісціны.

¹⁶А нягоднага пустаслоўя пазбягай; бо хто займаецца ім, тыя яшчэ больш будуць памнажаць бязбожнасць,

¹⁷і слова іх, як гангрэна, будзе раз’яда́ць усё. Да іх нале́жаць Імяне́й і Філі́т,

¹⁸якія ўхіліліся ад ісціны, кажучы, што ўваскрасенне ўжо было, і разбура́юць у некаторых веру.

¹⁹Аднак трывалы падму́рак Божы стаіць, маючы пячаць гэтую: “спазнаў Гасподзь Сваіх” і “няхай адсту́піць ад няпраўды кожны, хто вызнае́ імя́ Гасподняе”.

²⁰А ў вялікім доме ёсць посуд не толькі залаты і сярэбраны, але і драўляны і гліняны; і адзін у пачэсным, а другі ў нізкім ужы́тку.

²¹Дык вось, хто ачы́сціць сябе ад гэтага, той будзе пасудзінай пачэснай, асвячонай і патрэбнай Гаспадару́, гатовай да ўсякай добрай справы.

²²А юнацкіх пажа́днасцяў пазбяга́й, імкніся ж да праўды, веры, любові, міру з усімі, хто закліка́е Госпада ад чыстага сэрца.

²³Ад неразумных і бязглуздых спрэчак ухіляйся, ведаючы, што яны спараджа́юць сваркі;

²⁴рабу ж Гасподняму нельга свары́цца, а трэба быць прыя́зным да ўсіх, здольным навуча́ць, цярплівым,

²⁵з лагоднасцю настаўляць праціўнікаў, — ці не дасць ім Бог пакаяння для спазна́ння ісціны,

²⁶каб яны вы́зваліліся з пасткі дыявала, які палані́ў іх для выкана́ння яго волі.

 

Раздзел 3

¹Ведай жа тое, што ў апошнія дні настануць часы ця́жкія.

²Бо людзі будуць самалюбівыя, срэбралюбівыя, ганары́стыя, фанабэрыстыя, богазневажа́льнікі, бацька́м непако́рныя, няўдзячныя, бязбожныя, бессардэчныя,

³бязлітасныя, паклёпнікі, нястры́маныя, жорсткія, ненавіснікі дабра,

⁴здраднікі, нахабныя, пыхлівыя, больш сласталюбі́выя, чым богалюбі́выя,

⁵якія зне́шне паказваюць набожнасць, але ад сілы яе адракліся. Такіх пазбяга́й.

⁶Да іх нале́жаць тыя, што пранікаюць у дамы́ і зводзяць жанчын, якія патана́юць ў грахах і апанава́ны рознымі пажа́днасцямі,

⁷якія заўсёды вучацца і ніколі не могуць дайсці да спазна́ння ісціны.

⁸Як Іані́й і Іамвры́й працівіліся Маісею, так працівяцца ісціне і яны, людзі з сапсаваным розумам, недасведчаныя ў веры.

⁹Але яны не многага дасягну́ць; бо іх бязглу́здасць для ўсіх стане відавочнай, як і з тымі сталася.

¹⁰А ты стаў маім паслядоўнікам у вучэнні, жыцці, мэтах, веры, доўгацярпенні, любові, стойкасці,

¹¹у ганеннях, пакутах, якія вы́палі мне ў Антыяхі́і, Ікані́і, Лі́страх; такія ганенні я перанёс, і ад усіх збавіў мяне Гасподзь.

¹²Ды і ўсе, хто хоча жыць набожна ў Хрысце Іісусе, будуць цярпець ганенні;

¹³а ліхія людзі і ашуканцы будуць станавіцца яшчэ горшымі, уводзячы ў падман і бу́дучы падма́нутымі.

¹⁴Ты ж трымайся таго, чаму наву́чаны і што́ табе даве́рана, бо ве́даеш, кім ты наву́чаны;

¹⁵і яшчэ з маленства ты ведаеш свяшчэнныя пісанні, якія могуць умудры́ць цябе на спасенне праз веру ў Хрыста Іісуса.

¹⁶Усё Пісанне — боганатхнёнае і карыснае для навучання, для выкрывання, для выпраўлення, для настаўлення ў праведнасці,

¹⁷каб быў дасканалым Божы чалавек, да ўсякай добрай справы падрыхтава́ным.

 

Раздзел 4

¹Дык вось, я заклінаю цябе перад Богам і Госпадам нашым Іісусам Хрыстом, Які будзе судзі́ць жывых і мёртвых пры яўле́нні Яго і ў Царстве Яго:

²прапаведуй слова, будзь настойлівы ў час і не ў час, выкрыва́й, дакара́й, падбадзёрвай з усёй доўгацярплівасцю і з настаўленнем.

³Бо настане час, калі здаровага вучэння трымацца не будуць, а паводле сваіх хаце́нняў будуць выбіраць сабе настаўнікаў, якія б ла́шчылі слых;

⁴і ад ісціны адве́рнуць вушы і зве́рнуцца да баек.

⁵Але ты будзь пільны ва ўсім, цярпліва перанось беды, выконвай справу дабравесніка, здзяйсня́й служэнне сваё.

⁶Бо я ўжо станаўлюся ахвя́раю, і час майго адыходу настаў.

⁷Подзвігам добрым я падзвізаўся, шлях завяршыў, веру захаваў;

⁸а цяпер прызна́чаны мне вянец праведнасці, які дасць мне Гасподзь, Суддзя праведны, у дзень той; і не толькі мне, але і ўсім, хто з любоўю чакае яўле́ння Яго.

⁹Пастарайся прыйсці да мяне ў хуткім часе.

¹⁰Бо Дзімас пакінуў мяне, узлюбіўшы цяперашні век, і пайшоў у Фесалоніку, Крыскент у Гала́тыю, Ціт у Далма́тыю; адзін Лука са мною.

¹¹Марка вазьмі і прывядзі з сабою, бо ён мне патрэбны для служэння.

¹²Ціхіка я паслаў у Эфес.

¹³Калі пойдзеш, прынясі плашч, які я пакінуў у Траадзе ў Карпа, і кнігі, асабліва перга́ментныя.

¹⁴Меднік Аляксандр многа зла зрабіў мне. Няхай адпла́ціць яму Гасподзь паводле спраў яго!

¹⁵Асцерагайся і ты яго, бо ён вельмі працівіўся нашым сло́вам.

¹⁶Пры першым слу́ханні маёй справы нікога не было са мною, а ўсе мяне пакінулі. Няхай гэта не залі́чыцца ім!

¹⁷Але Гасподзь явіўся мне і ўмацаваў мяне, каб праз мяне распаўсю́дзілася дабравесце і пачулі яго ўсе язычнікі; і я быў вы́звалены з пашчы льва.

¹⁸І збавіць мяне Гасподзь ад усякай справы ліхой і зберажэ для Свайго Нябеснага Царства. Яму слава на векі вякоў. Амінь.

¹⁹Вітай Прыскілу і Акілу і дом Анісі́фара.

²⁰Эраст застаўся ў Карынфе; а Трафіма я пакінуў хворага ў Міліце.

²¹Пастарайся прыйсці да зімы. Вітаюць цябе Эвул і Пуд, і Лін і Клаўдзі́я, і ўсе браты.

²²Гасподзь Іісус Хрыстос з духам тваім. Благадаць з вамі. Амінь.