Раздзел 1

¹Павел, вязень Хрыста Іісуса, і Цімафей брат, — Філімону ўзлю́бленаму, супрацоўніку нашаму,

²і Апфіі, сястры ўзлю́бленай, і Архіпу, спадзві́жніку нашаму, і дамашняй тваёй царкве:

³благадаць вам і мір ад Бога, Айца нашага, і Госпада Іісуса Хрыста.

⁴Дзякую Богу майму, заўсёды паміна́ючы цябе ў малітвах маіх,

⁵чуючы пра тваю любоў і веру, якую ты маеш да Госпада Іісуса і да ўсіх святых,

⁶каб вера твая, супольная з нашай, была дзейснай у спазнанні ўсякага дабра, якое ў вас дзеля Хрыста Іісуса.

⁷Бо мы маем радасць вялікую і суцяшэнне ў любові тваёй, таму што табою, браце, супако́ены сэрцы святых.

⁸Таму, ма́ючы вялікую ў Хрысце адвагу зага́дваць табе нале́жнае,

⁹больш па любові прашу я, Павел, будучы старцам, а цяпер і вязнем Іісуса Хрыста;

¹⁰прашу цябе за сына майго Анісіма, якога спарадзіў я ў кайданах маіх:

¹¹ён быў калісьці бескарысным для цябе, а цяпер — вельмі карысны табе і мне; я адсылаю яго да цябе;

¹²ты ж прымі яго, як маё сэрца.

¹³Я хацеў утрымаць яго пры сабе, каб ён замест цябе паслужыў мне, які ў кайданах за дабравесце;

¹⁴але я нічога не хацеў рабіць без тваёй згоды, каб добрая справа твая была не вы́мушанай, а дабравольнай.

¹⁵Бо, магчыма, ён дзеля таго адлучы́ўся на кароткі час, каб ты прыняў яго назаўсёды,

¹⁶ужо не як раба, а вышэй за раба, як брата ўзлюбленага, асабліва для мяне, а тым болей для цябе — і па плоці, і ў Госпадзе.

¹⁷Дык вось, калі маеш мяне за супольніка, то прымі яго, як мяне.

¹⁸Калі ж ён нанёс табе нейкую шкоду альбо доўг ма́е, то лічы́ гэта на мне.

¹⁹Я, Павел, напісаў сваёю рукою: я заплачу́; каб не казаць табе, што ты і самога сябе мне вінен.

²⁰Так, браце, дазволь мне мець карысць ад цябе ў Госпадзе; супакой маё сэрца ў Госпадзе.

²¹Упэўнены ў паслухмянасці тваёй, я напісаў табе, ведаючы, што ты зробіш і больш, чым я кажу.

²²А разам з тым падрыхтуй мне і гасцявы́ пакой; бо, спадзяюся, што па малітвах вашых я буду дарава́ны вам.

²³Вітае цябе Эпафрас, вязень разам са мною дзеля Хрыста Іісуса,

²⁴а таксама Марк, Арыстарх, Дзімас, Лука, супрацоўнікі мае́.

²⁵Благадаць Госпада нашага Іісуса Хрыста з духам вашым. Амінь.